საწარმოები, რომლებმაც სახელმწიფო „იაფი კრედიტები“ მიიღეს, გაბანკროტების პირას იმყოფებიან. 15-მა საწარმომ ფინანსთა სამინისტროში მათი ვალდებულებების გადავადების მოთხოვნით ჯერ კიდევ 2009 წელს მიმართეს. სამინისტრომ მათ შეღავათები დაუწესა, თუმცა კრედიტების დაფარვა საწარმოებმა მაინც ვერ შეძლეს. დღეს კი მუნიციპალური განვითარების ფონდმა, რომელსაც მთავრობამ იაფი კრედიტებით მოსარგებლე საწარმოების მონიტორინგი დაავალა, სასამართლოს რამდენიმე მათგანის საქმე გადასცა.

ამასთან ერთად, „ეკონომიკური პალიტრის“ ინფორმაციით, ფონდმა იმ საწარმოებს, ვინც კრედიტი არ დაფარა, თითოეული გადავადებული დღისთვის ჯარიმები დაუწესა.

შეგახსენებთ, რომ მთავრობამ იაფი კრედიტები დაახლოებით 120 საწარმოსათვის ორი წლის ვადით გასცა. კრედიტებზე საპროცენტო განაკვეთი უპრეცედენტოდ დაბალია: 7 პროცენტი. უპირატესობა ექსპორტზე მომუშავე კომპანიებს ენიჭებოდა.