სვანეთში ზამთრის საკურორტო სეზონი მომავალი წლის იანვარში გაიხსნება. ამის შესახებ საქართველოს ტურიზმის და კურორტების დეპარტამენტის ხელმძღვანელმა მაია სიდამონიძემ განაცხადა და ამასთან აღნიშნა, რომ სეზონის ოფიციალური პრეზენტაცია დეკემბრის შუა რიცხვებში გაიმართება.

„როგორც ცნობილია, სვანეთში დიდი ინფრასტრუქტურული სამუშაოები ტარდება. შენდება აეროპორტი, რომელიც ექსპლუატაციაში წლის ბოლომდე შევა, ასევე შენდება სათხილამურო ტრასები და საბაგირო გზები. თავის მხრივ, ჩვენ სვანეთში ტურისტებისათვის სამედიცინო პუნქტსა და ტურიზმის საინფორმაციო ცენტრს ვხსნით. გამომდინარე აქედან, იანვრამდე სეზონის გახსნა, სავარაუდოდ, ვერ მოხერხდება, თუმცა ოფიციალურ პრეზენტაციას დეკემბრის შუა რიცხვებში მოვაწყობთ“, - განაცხადა სიდამონიძემ.

მიმდინარე წელს საქართველოში ზამთრის საკურორტო სეზონის ოფიციალური გახსნა დეკემბრის შუა რიცხვებში იგეგმება. ტურიზმის დეპარტამენტის ინფორმაციით, სეზონის განმავლობაში ბაკურიანში, გუდაურსა და მესტიაში 150 ათას უცხოელ და 30 ათასამდე ადგილობრივ ტურისტს ელიან.