საქართველოს სანოტარო პალატაში ახალი სერვისი დაინერგა: მოქალაქეები სამართლებრივი კონსულტაციების მიღებას ონლაინ-რეჟიმშიც შეძლებენ.

„პალატის იურიდიულ სამსახურს სამართლებრივი კონსულტაციებისათვის თვეში 150 მოქალაქე მიმართავს, ხოლო სატელეფონო კონსულტაციას 1000-მდე ადამიანი იღებს. ონლაინ-მომსახურება მნიშვნელოვნად გაუმარტივებს მოქალაქეებს (განსაკუთრებით საზღვარგარეთ მყოფებს) კონსულტაციის მიღებას“, - განაცხადა პალატის თავმჯდომარემ ნინო ხოშტარიამ.

პალატის სტრატეგიულ მიზანს მოქალაქეებზე ორიენტაცია წარმოადგენს. უკანასკნელ პერიოდში დანერგილი სიახლეების წყალობით მომსახურება ბევრად უფრო ეფექტური, მარტივი და ხარისხიანი გახდა.

სანოტარო მოქმედებების განხორციელება უკვე ონლაინ-რეჟიმშიცაა შესაძლებელი: განცხადების, შეთანხმებისა და მინდობილობის დადასტურებას ინტერნეტის საშუალებით საქართველოს მოქალაქეები მსოფლიოს ნებისმიერი ქვეყნიდან შეძლებენ, ხოლო ორი ან მეტი ნოტარიუსის მონაწილეობით გარიგებათა დადასტურებას - საქართველოს ნებისმიერი კუთხიდან.