აშშ ხელოვნურად ასუსტებს თავის ეროვნულ ვალუტას, რითაც მთელ მსოფლიოში გაცვლითი კურსებით მანიპულირებს. ამის შესახებ აშშ-ის ფედერალური სარეზერვო სისტემის (ფსს) ყოფილმა უფროსმა ალან გრინსპენმა განაცხადა. მას არ დაუზუსტებია, თუ კერძოდ რომელი უწყებაა პასუხისმგებელი მანიპულაციებზე.

11 ნოემბერს გრინსპენის სიტყვები გაზეთ Financial Times-ში გამოქვეყნდა. მსოფლიოს მრავალი ქვეყნის ხელისუფლებებმა უკვე გააკრიტიკეს აშშ-ის სავალუტო პოლიტიკა და ფსს-ის გეგმები, რომლებიც 600 მლრდ დოლარის სახელმწიფო ობლიგაციების შესყიდვას ეხება. ეკონომისტები დარწმუნებულნი არიან, რომ ამერიკული ობლიგაციების შესყიდვა მსოფლიო ვალუტების ამაღლებას გამოიწვევს. ფსს-ის გადაწყვეტილების ნეგატიური ზეგავლენა უკვე აღნიშნეს ინდონეზიის ცენტრალურ ბანკმა და სამხრეთ-აფრიკული რესპუბლიკის ფინანსთა მინისტრმა პრავინ გორჰანმა.

ამასთან, აშშ-ის სავალუტო პოლიტიკაზე ფორმალურად ამერიკის ფინანსთა სამინისტროა პასუხისმგებელი, რომელსაც სათავეში ტიმოტი გაიტნერი უდგას. გაიტნერი არაერთხელ გამოსულა ძლიერი დოლარის მხარდასაჭერად, მაგრამ არასდროს დაუსახელებია მისი რეალური ფასი. ფსს-ის ამჟამინდელი უფროსის ბენ ბერნანკის სიტყვებით, მას ესმის ეროვნული ვალუტის ღირებულება და მის დაქვემდებარებაში მყოფი უწყების მოქმედებებს მსოფლიო ფინანსური სისტემისათვის საშიშად არ მიიჩნევს.