მომავალ წელს საქართველოს ხელისუფლება 240 მილიონის დახარჯვას ტურისტულ სფეროზე აპირებს. ამის შესახებ საქართველოს პარლამენტის საბიუჯეტო-ფინანსური კომიტეტის სხდომაზე საქართველოს ფინანსთა მინისტრმა კახა ბაინდურაშვილმა განაცხადა.

როგორც მინისტრი აცხადებს, „ტურისტული მიმართულება ის სფეროა, რომლიდანაც მიღებული მოგება თითოეული ოჯახისათვის შემოსავალს წარმოადგენს, ამიტომ მომავალ წელს ხელისუფლებათა ერთ-ერთ უმთავრეს პრიორიტეტად ტურიზმია დასახელებული“.

მისივე თქმით, გამოყოფილი 240 მილიონის დახარჯვას მთავრობა სამი მიმართლებით გეგმავს. კერძოდ, ბათუმის ტურისტული ინფრასტრუქტურის გაუმჯობესებაზე 130 მლნ ლარია გათვალისწინებული, მესტიის ტურისტულ ინფრასტრუქტურაზე გზების ჩათვლით - 76.5 მლნ ლარი, ხოლო 33.5 მლნ ლარი ანაკლია-განმუხურის ტურისტული ინფრასტრუქტურის განვითარებას მოხმარდება.