ოქტომბრის თვეში ჩინეთში ინფლაციამ 4.4%-ს მიაღწია, რის შედეგადაც ფასთა ზრდის მორიგი რეკორდი დამყარდა.

როგორც BBC ჩინეთის სახელმწიფო სტატისტიკურ მმართველობაზე მინიშნებით იტყობინება, სამომხმარებლო ფასების ინდექსის 4.4%-ით გაზრდა უკანასკნელი 25 თვის განმავლობაში მაქსიმალურ მაჩვენებელს წარმოადგენს.

РИА «Новости»შეგვახსენებს, რომ მანამდე ინფლაციამ ორწლიან მაქსიმუმს სექტემბერში მიაღწია, როდესაც ფასთა ზრდამ 3.6% შეადგინა.

ჩინეთის სახელმწიფო სტატისტიკური მმართველობის მონაცემთა თანახმად, მიმდინარე წლის პირველი 10 თვის განმავლობაში ინფლაციამ 3% შეადგინა. თუმცა ამავე დაწესებულების რეფორმებისა და განვითარების კომიტეტის უფროსმა ცჟან პინმა განაცხადა, რომ, ხელისუფლების პროგნოზების საწინააღმდეგოდ, 2010 წელს ინფლაციამ ჩინეთის სახალხო რესპუბლიკაში შესაძლოა 3%-ს გადააჭარბოს. როგორც РИА «Новости» იუწყება, ჩინეთის ეკონომისტები 2011 წელს 4%-ის სიდიდის ინფლაციას პროგნოზირებენ.