მასობრივი ინფორმაციის საშუალებებმა და მსოფლიო ექსპერტებმა არასწორად გაიგეს მსოფლიო ბანკის პრეზიდენტის რობერტს ზელიკის მიერ არც თუ ისე დიდი ხნის წინ გაკეთებული განცხადება. ამის შესახებ 10 ნოემბერს თავად ზელიკმა განაცხადა. მისი სიტყვებით, მას ოქროს სტანდარტზე დაბრუნება არ შემოთავაზებია.

თავის სვეტში Financial Times-ში 8 ნოემბერს ზელიკს უბრალოდ სურდა, განეცხადებინა ახალი სავალუტო სისტემის შექმნის აუცილებლობის შესახებ, სადაც სარეზერვო ვალუტების ფუნქციებს არა მხოლოდ ამერიკული დოლარი, არამედ ჩინური იუანი, ევრო, იაპონური იენი და ბრიტანული ფუნტი შეასრულებდა.

„მე იმაზე ვსაუბრობდი, რომ ამჟამად ოქროს ალტერნატიულ მონეტარულ აქტივად მიიჩნევენ. ეს იგივე არაა, რაც ოქროს სტანდარტი. ოქრო გახდა ორიენტირი, იმიტომ რომ ისინი, ვისაც ფული აქვს, ხედავენ იუანის გარდა ყველა ვალუტის სუსტ და ძალზედ ბუნდოვან პერსპექტივებს, იუანი კი დღემდე არ იმყოფება თავისუფალ გაცვლაში“, - ზელიკის ეს სიტყვები Financial Times-შია მოყვანილი.

„ინვესტორებისათვის, რომლებსაც ჯერ კიდევ არ აურჩევიათ პერსპექტიული პროექტი, ოქროში ფულის დაბანდება ყველაზე მიზანშეწონილია“, - ხაზი გაუსვა ზელიკმა. 9 ნოემბერს ნიუ-იორკის ბირჟაზე ოქრო რეკორდულ მაჩვენებლამდე გაძვირდა.