„კურორტი საირმე“ „საირმის განვითარების კომპანიის“ საკუთრება ხდება, იუწყება “GHN“. როგორც სააგენტოსთან საუბრისას ეკონომიკის მინისტრის მოადგილემ დავით გიორგაძემ თქვა, ინვესტორმა კურორტი 1 ლარის ოდენობის სიმბოლურ თანხად შეიძინა, სანაცვლოდ კი ვალდებულია, კურორტის განვითარებაში 10 მლნ ლარი დააბანდოს.

თავდაპირველად მთავრობა გეგმავდა, რომ ინვესტორს კურორტისათვის 60 ათასი ლარი უნდა გადაეხადა, თუმცა მოგვიანებით გადაწყვეტილება შეიცვალა და მყიდველმა 1 ლარის ოდენობის სიმბოლური თანხა გადაიხადა.

გეგმის თანახმად, „საირმის განვითარების კომპანია“ ვალდებულია, 2012  წლამდე კურორტის ეტაპობრივი განვითარება განახორციელოს.

ხელშეკრულების გაფორმების შემდეგ კომპანია ასევე ვალდებული იქნება, უზრუნველყოს თანამედროვე ინფრასტრუქტურის შექმნა მინერალური წყლის - „საირმის“ წარსადგენად.