პოეტის, პროზაიკოსისა და ესეისტის გივი ალხაზიშვილის, პოეტ ზვიად რატიანის, მწერლისა და პოეტის ბესიკ ხარანაულის ნაწარმოებები ცნობილი ამერიკული ჟურნალის - “The Dirty Goat“-ის 23-ე გამოშვებაში მოხვდა. ეს პირველი შემთხვევაა, როდესაც ამერიკული გამომცემლობა ქართველი ლიტერატორებით დაინტერესდა.

როგორც საქართველოს კულტურის სამინისტროში განაცხადეს, ქართველ ავტორებს ჟურნალში მოხვედრაში ქართული პოეზიით დაინტერესებული მთარგმნელი ტიმოტი კერჩნერი დაეხმარა. საქართველოდან წასვლის შემდეგ (კერჩნერი საქართველოში ინგლისური ენის პედაგოგად მუშაობდა) მთარგმნელი პოეტ ლელა სამნიაშვილს დაუკავშირდა, რომელმაც შეკრიბა ზვიად რატიანისა და გივი ალხაზიშვილის ლექსები, ხოლო ბესიკ ხარანაულის ლექსები ამოარჩია მთარგმნელმა ანი კოპალიანმა. ამის შემდეგ ტიმოტი კერჩნერმა გადათარგმნა ქართველი პოეტების პოეზია და ჟურნალ „The Dirty Goat“-ის რედაქციაში მიიტანა.

ჟურნალი “The Dirty Goat”, რომელიც 150 გვერდს შეიცავს, წელიწადში ორჯერ გამოდის და აერთიანებს მსოფლიოს სხვადასხვა ქვეყნების პოეზიას, პროზას, დრამასა და სახვითი ხელოვნების ნიმუშებს. დაარსებიდან (1988 წელი) დღემდე ჟურნალი ხელს უწყობს თანამედროვე ხელოვნების წარდგენასა და მის პოპულარიზაციას სხვადასხვა ქვეყნებში.

ჟურნალი ორენოვანია, ნამუშევრები წარმოდგენილია ორიგინალის ენასა და ინგლისური თარგმანით.