აშშ-ის მთავრობა იწყებს კომპიუტერული სისტემის ექსპლუატაციას, რომელსაც უნარი აქვს, ავტომატურ რეჟიმში გაანეიტრალოს ჰაკერთა თავდასხმები. ამის შესახებ გუშინ აშშ-ის ეროვნული უსაფრთხოების მინისტრმა ჯანეტ ნაპოლიტანომ განაცხადა.

მისი თქმით, მიმდინარე წელს ამერიკული ადმინისტრაცია „განაგრძობს შემუშავებას და დაიწყებს ექსპლუატაციას“ კომპიუტერული სისტემისა კოდური სახელწოდებით „ეინშტეინ-3“, რომელიც ეროვნული უსაფრთხოების სამინისტროს უნარს მისცემს, ავტომატურად გამოავლინოს და გაანეიტრალოს მავნე საქმიანობა კიბერსივრცეში. სისტემის შესახებ სხვა დეტალებზე ნაპოლიტანოს არ უსაუბრია.

მან ასევე განაცხადა, რომ მიმდინარე წელს აშშ-ის ფედერალური მთავრობა ასევე „დაასრულებს შემუშავებას და დანერგავს“ სხვა კომპიუტერულ სისტემას, რომლის სახელწოდებაც გახლავთ „ეინშტეინ-2“. ამ სისტემის ფუნქცია კიბერსივრცეში „საფრთხეთა გამოვლენა“ იქნება, აღნიშნა ნაპოლიტანომ.