„ლატარიის კომპანიამ“, ლატარიაზე გადასახის სახით, ფინანსთა სამინისტროში 10 675 990 ლარი გადარიცხა. მოცემული თანხის ნაწილი სპორტისა და კულტურის განვითარებას მოხმარდება.

როგორც კომპანიის გენერალურმა დირექტორმა ელი კეიდარიმ ფულის გადაცემის ღონისძიებაზე განაცხადა, მრავალ ქვეყანაში ეროვნულ ლატარიებს კულტურისა და სპორტის სფეროების დაფინანსებაში საკუთარი წვლილი შეაქვთ.

„საქართველოს ლატარიის კომპანია ბედნიერია, რომ ქვეყნის ეკონომიკის განვითარებაში საკუთარი წვლილი შეაქვს“, - აღნიშნა მან.

10 675 990 ლარის გარდა, სხვადასხვა გადასახადის სახით კომპანიამ უკვე გადარიცხა დაახლოებით 3 მილიონი ლარი. 2 წლიანი სამუშაოების შემდეგ „საქართველოს ლატარიის კომპანიამ 40 000-ზე მეტი გამარჯვებული გამოავლინა და მოგების სახით 25 მილიონამდე ლარი გასცა.

ფინანსთა მინისტრის მოადგილის ნათია მიქელაძის განცხადებით, „საქართველოს ლატარიის კომპანიას“ ქვეყანაში ლატარიების ჩატარების 10 წლიანი ექსკლუზიური უფლება აქვს. მისი სიტყვებით, კომპანიამ ხელშეკრულებით გათვალისწინებული ყველა ვალდებულება შეასრულა და ნოემბერში ბიუჯეტში გრაფიკით გათვალისწინებული თანხა გადარიცხა.