საქართველოს პრემიერ-მინისტრმა 2010 წლის 10 თვის მაკროეკონომიკურ მაჩვენებლებთან დაკავშირებით კმაყოფილება გამოთქვა. როგორც ნიკა გილაურმა დღეს სამთავრობო სხდომაზე განაცხადა, 2010 წლის 10 თვის განმავლობაში ექსპორტი 33%-ით გაიზარდა.

„ექსპორტის სტაბილური განვითარება გამოწვეულია არა მხოლოდ ფასების ზრდით, არამედ იმითაც, რომ საქართველოდან სულ უფრო მეტი დასახელების პროდუქცია გადის და გაიზარდა საექსპორტო ქვეყნების არეალი“, - თქვა მან.

პრემიერმა აღნიშნა უძრავი ქონების ბაზარზე გაზრდილი ტრანზაქციები. „უძრავი ქონების რეგისტრაციის მაჩვენებელი გაიზარდა 23%-ით წინა წლის ანალოგიურ მაჩვენებელთან შედარებით, ხოლო ავტომანქანების რეგისტრაციამ იმატა 33%-ით“, - განაცხადა გილაურმა.

გილაური საქართველოში ვიზიტიორთა ზრდითაც კმაყოფილია. მისი მონაცემებით, 2010 წელს, 2009 წელთან შედარებით, ქვეყანაში 38%-ით მეტი ვიზიტიორი ჩამოვიდა.

„ეს ნიშნავს, რომ იზრდება ტურიზმი და ჩვენ ვვარაუდობთ, რომ წლის ბოლოს ქვეყანაში ტურისტთა რიცხვი 2 მილიონს გადააჭარბებს, რაც საქართველოსათვის რეკორდული მაჩვენებელი იქნება“, - აღნიშნა პრემიერმა.