ერთწლიანი უშედეგო მოლაპარაკებების შემდეგ კომპანია „ნაბეღლავმა“ ირანში პარტნიორები გამოცვალა. ამის შესახებ განაცხადა კომპანიის გენერალურმა დირექტორმა ავთანდილ სვიმონაშვილმა.

მისი სიტყვებით, ამჯერად მოლაპარაკებები ნაყოფიერი იქნება და „ნაბეღლავი“ აუცილებლად შევა ირანულ ბაზარზე. თუმცა, ექსპორტის დაწყების ზუსტ დროს სვიმონიშვილი არ აკონკრეტებს.

კომპანიას განზრახული ჰქონდა, ირანში ექსპორტი ჯერ კიდევ გასული წლის მაისში დაეწყო, მაგრამ უშედეგოდ. მაშინ მენეჯმენტმა ამის მიზეზად დაასახელა ის ფაქტი, რომ ირანი ექსპორტისათვის ჩაკეტილ სახელმწიფოს წარმოადგენს და ბიზნეს-საქმიანობას მანდ მხოლოდ პირადი კავშირები წყვეტენ.

დღესდღეობით მინერალური წყალი „ნაბეღლავი“ ექსპორტირდება აზერბაიჯანში, სომხეთში, ბალტიისპირეთის ქვეყნებსა და კვიპროსში.