ფოთის პორტი ახალი პორტის პროექტის განხილვას იწყებს. პროექტთან დაკავშირებით დღეს ნაბადას რაიონის მაცხოვრებლებთან და არასამთავრობო სექტორთან შეხვედრა გაიმართა. შეხვედრები ეწყობა სამეცნიერო კვლევების სფეროში მოღვაწე ფირმა „გამას“ ინიციატივით, რომელიც ახალი პორტის გარემოზე ზემოქმედებასთან და სოციალურ ეფექტებთან დაკავშირებით დასკვნას მოამზადებს.

როგორც პორტში აცხადებენ, ახალი პორტის მშენებლობის საკითხი გადამწყვეტ ფაზაში მომავალი წლიდან შევა.

პორტის აქციათა 100% საინვესტიციო სააგენტო „RAKIA“-ს ეკუთვნის. საქართველოს მთავრობასთან გაფორმებული ხელშეკრულების საფუძველზე კომპანიამ უკვე შეასრულა ნაწილი საინვესტიციო ვალდებულებებისა და აგრძელებს საინვესტიციო პროექტებზე მუშაობას. კერძოდ, ხორციელდება ახალი პორტის კონტეინერული ტერმინალის მშენებლობის, მოქმედი დამცავი მოლოს რეაბილიტაციისა და ახალი მოლოს მშენებლობის პროექტები.

2011 წლიდან პორტის მიერ მოწვეულ კონსულტანტ-ინჟინერთა ჯგუფი ტერმინალის დიზაინის დეტალების დაგეგმვას შეუდგება. მოცემული ჯგუფი კონტეინერული ტერმინალის მშენებლობის მონიტორინგს განახორციელებს. მშენებლობის პროცესი 2014 წლის პირველ ნახევარში უნდა დასრულდეს. ტერმინალის მუშაობისათვის ახალი საავტომობილო გზა და სარკინიგზო ხაზებია აუცილებელი. ქართული კვლევითი კომპანია „გამა“, თავის საერთაშორისო ასოციაცია „ენვირონთან“ ერთად, ტერმინალის მშენებლობის გარემოზე ზემოქმედებასთან და სოციალურ ეფექტებთან დაკავშირებით მოამზადებს შესაბამის დასკნას.