საქართველოში ირლანდიური ბიზნეს-საბჭო იმუშავებს. ეს იქნება კავკასიური ბიზნეს-წარმომადგენლობა, რომლის საქმიანობაც სამხრეთ კავკასიის სამივე სახელმწიფოზე გავრცელდება. ოფისი თბილისში იქნება განლაგებული.

როგორც საბჭოს წარმომადგენლები აცხადებენ, ისინი საქართველოში ირლანდიელი ინვესტორების მოზიდვაზე იქნებიან ორიენტირებულნი, ასევე დაიცავენ მათ უფლებებს და სასარგებლო ინფორმაციით უზრუნველყოფენ.


ირლანდიის ელჩის უილიამ მაიკლ მაკარტის თქმით, საბჭოს ამოცანებში ორ ქვეყანას შორის ეკონომიკური და ტურისტული კავშირების განვითარება შევა. მან აღნიშნა, რომ ირლანდიური ბიზნეს-საბჭოს წარმომადგენლობის გახსნას წინ უძღოდა საქართველოში ირლანდიის საელჩოს გახსნა.

„ამ ღონისძიებათა მიზანია საქართველოსა და ირლანდიას შორის ეკონომიკური კავშირების განვითარება“, - აღნიშნა ელჩმა.

წარმომადგენლობაში იმედოვნებენ, რომ ბიზნეს-საბჭო საქართველოში ირლანდიური ბიზნესის შემოსვლის პლატფორმა გახდება.